Иако досега бевме предупредувани да не претеруваме со кркањето јајца, стручњаците советуваат дека за организмот е многу здраво да се јаде по едно јајце на ден. Се согласуваме, нормално :)
Нутриционистите велат дека јајцата се меѓу најхранливите прехрамбени производи денеска и препорачуваат едно јајце на ден за да се оствари максималната корист од овој оброк.
Резултатите на истражувањето се објавени неодамна, а студијата ќе биде објавена во магазинот Nutrition and Food Science, а покрива 71 истражување за нутритивните состојки на јајцата и нивната улога во диетите. Во нив научниците дојдоа до заклучок дека јајцето, иако има малку калории, е богато со нутриенти кои се клучни за здравјето, а тоа се особено витамините Д и Б12, селенот и колинот.
Меѓу храната богата со протеини јајцето е најбогато со мешавина на есенцијални аминокиселини, клучни за децата, адолесцентите и младите личности бидејќи рамнотежата на овие супстанци е клучна за растот и развојот. Јајцето содржи и високо ниво на антиоксиданси што значи дека може да спречи макуларна дегенерација, главниот предизвикувач на слепило на постара возраст.
„Јајцето толку придонесува за здравјето, што без претерување може да се нарече „суперхрана“. Јајцата се храна која е можеби најбогата со нутриенти“, вели др. Кери Ракстон, нутриционист и автор на извештајот.
Јајцето може да одигра значајна улога и во диетите, бидејќи неговата жолчка има помалку од 80 калории.
Eпа, ионака секој ден јадете виртуелна Кајгана и сте сведоци дека делува пријатно врз вас...зошто не би пробале да го подобрите квалитетот на живеењето и на ова друго ниво? Секое утро по едно јајце, па зграпчете го денот со двете раце :)
Б.И. | Кајгана
