Јужнокорејскиот џин за производство на потрошувачка електроника го подигна поимот на магнет за фрижидер на едно сосема ново ниво. Наместо вообичаените ликови на животинки, светски знаменитости и слични магнетчиња, Samsung на вратата на својот нов фрижидер „залепи“ екран осетлив на допир.
Samsung Electronics го претстави својот најнов фрижидер наречен Zipel e-Diary. Основната карактеристика која го донесе фрижидеров на нашата страница е податокот дека на него има вграден екран од 10 инчи осетлив на допир.
Екранот е опремен со сопствен Wi-Fi модул, така што на него е можно прикажување на интернет содржини, а можно е и да се користи за приказ на фотографија, рецепти и слични содржини кои ќе ви се најдат во кујната.
Zipel e-Diary за сега е достапен само на јужнокорејскиот пазат и тоа по цена од 2.174 долари, а дали и кога ќе се појави во остатокот од светот, се' уште не се знае.
Слична идна варијанта би можел да биде фрижидер со вештачка интелигенција, кој ќе ве тужарка на сопствениот Фејс или Твитер профил: „Газдава пак ми пие од пивото. Сега ќе види како се чува месо на +12 степени. Хаха!“. Е што, да не сме далеку од ова? :)
Фото/извор: Samsung
Б.И. | Кајгана
