Најмалку 60 луѓе се убиени до четврток во најжестоките поплави во Пакистан во последниве неколку децении, а уште стотици илјади се заглавени во непристапни места, јавува Асошиејтед прес.
Монсунските дождови во северозападен Пакистан ги преполнија реките, кои ги рушат заштитните насипи и носат цели улици во населените места, а пробиена е и новата брана .во округот Чарсада. Посевите во целиот регион се речиси сосема уништени.
Стотици луѓе се водат како исчезнати, вклучувајќи и девет градежни работници – Кинези, кои исчезнале во поплавите во областа Кохистан, а уште околу 200 кинески работници се заглавени на непристапни места.
Според локалните функционери, ова се најлошите поплави во северозападен Пакистан од 1929 година наваму, а се проценува дека бројот на луѓе кои се заглавени во непристапни места без храна и вода се движи околу 400.000.
„Спасувачка операција со хеликоптери не може да се изведе поради лошото време, а во целата провинција на располагање има само 48 спасувачки чамци“, изјави Миан Ифтикар Хусаин, министер за информации на провинцијата Кибер-Пактунква која е најпогодена од поплавите. Тој додаде дека прогнозите велат оти во наредните 24 часа врнежите од дожд уште повеќе ќе се засилат.
Монсунските сезони честопати доведуваат до поплави во Пакистан, при што најсиромашните селани од низинските села секогаш најмногу страдаат. Тоа е затоа што само сиромашните живеат во тие области, затоа што не можат да си дозволат живеалишта во побезбедните зони.
Некои пакистански експерти претпоставуваат дека поројните дождови се фактор и во катастрофалната авионска несреќа што се случи во среда во пакистанската престолнина Исламабад и во која загинаа 152 патника.
