Недела, 30.11.2008
Илија Шулев
Ретки се местата на планетава каде можете да пиете шампањ и да ручате под вода со поглед на егзотичен залив, но ресторанот кој го проектирала Aјала Серфати во Израел покрај Црвеното море ви го нуди тоа.
Во Red Sea Star имате чувство како да сте во водениот свет на Алиса од земјата на чудата. Јадете салата од морска трева, на маса од корали, седите на барски столови во облик на морско коњче и низ чашата со Мартини гледате во ламба во облик на морска ѕвезда.
Ресторанот се наоѓа на околу 6 метри под површината на морето и на околу 90 метри од брегот на Елијат заливот. Ресторанот е место кое едноставно мора да се посети. Замислете си пештера од соништата во која можете да ја почуствувате чудната сензација дека покрај вас проаѓаат морски суштества додека пиете пијалок или уживате во гурамнскиот оброк. Ќе бидете ли доволно храбри да нарачате некој морски специјалитет?
Ресторанот е изграден во 1997 година, има 100 места и е во најпрометниот дел на Елијат. Се наоѓа до познатата подводна опсеравторија на Meридиен хотелот. Најнапред се инсталирани три големи подводни резервоари кои ги изградила и монтирала една нафтена компанија. На местото каде требало да биде објекот поставени се 4.000 тони бетон за истиот да потоне на морското дно. Усидрени се 34 округли столбови кои се одвлечени на 15 метри длабочина и залиени со бетон.
Целиот објект е тежок 6.000 тони. До него се доаѓа со помош на 70 метарски мост кој ресторанот го поврзува со брегот.
На двата ката над нивото на морето се наоѓа влезниот дел со ходник, кафе-бар и продавница за сувенири. Во меѓунивото се наоѓаат канцелариите и собите за одмор. На 5 метри под површината на морето се наоѓа ресторанот.
