Во спектакуларните реванш дуели од осмина финалето на Лигата на шампиони Топџиите со маестрална изведба му го нанесоа најтешкиот пораз на Порто во ова натпреварување (5:0), додека Баварците во вистински трилер ја поминаа Фиорентина и покрај поразот од 3:2, поради подобриот скор на гостински терен.
На Емирати Порто го торпедираа Насри, Ебуе и Бендтнер во три наврати (еднаш од пенал). Да се потсетиме, Арсенал настапи без Фабрегас, Галас и Ван Перси, а негативата од Португалија ја анулираше уште во 10. минута кога младиот Бендтнер за прв пат ја затресе мрежата на Хелтон.
Одлична фудбалска претстава понудија и Фиорентина и Баерн. „Виола“ од првата минута тргна во атак кон голот на Бут во потрага по погодокот кој ќе ја анулира предноста на Германците стекната во контроверзниот прв дуел - и тоа и појде од рака во 28. минута со погодокот на Варгас.
Во 54. минута виолетовите ја зголемија предноста преку Јоветиќ, и дојдоа на чекор до пласман во четврт финалето.
Секако, доколку резултатот останеше таков. Но, на Артемио Франки се случи вистински огномет од голови. Најпрво Баерн намали на 2:1 и ги врати работите на самиот почеток, за двата тима.
Први на потег беа домаќините кои преку Јоветиќ зголемија на 3:1, за минута подоцна славјето да им го расипе Арјен Робен со вистинска бомба која Себастијан Фреј немаше никаква шанса да ја одбрани и со поглед го проследи голот кој на Баварците им го донесе четврт-финалето во годинешната ЛШ.
Б.И. | Кајгана
