Како Екрем ги обедини народите

Болката, поетичноста, искреноста, генијалноста на ремек-делото “Куча пос'о“ одекнаа на сите краишта на светот и го направија неговиот автор ѕвезда. Толкава ѕвезда што и угледен британски весник одвои простор за неговата величина.

Да, за ликот и делото на Екрем Јевриќ на кои не е во ред ниту да им се потсмееш, The Independent одвои простор и напиша сериозен текст.

Толку сериозен, што освен што го прогласуваат за балкански Борат, новинарите од The Indеpendent сметаат дека “господин-човек“ Јевриќ успеал со својот хит да ги обедини народите од бившата Југославија (!).

Британскиот весник опишува и како човекот-феномен по потекло од Црна Гора бил дочекан како крал кога за првпат по почетокот на војната во '90-те се вратил во татковината. На просторите на бивша Југославија ѕвездата, пишува Independent, стекнала статус на вистински “селебрити“ - за него дискутираат музичките критичари, а луѓето го канат да пее по бројни свадби. Екрем е баран и во американските клубови, особено во градовите каде има многу иселеници од овие простори.

И видео клиповите од неговите настапи во САД (на кои, во паузите меѓу изведбите, господин човекот си ги чепка забите со кредитна картичка) имаат повеќемилионска гледаност. Сепак, Екрем се пожалил дека “луѓето од YouTube не му платиле ни цент“, а на прашањето зошто е толку популарен, одговорил: „Луѓето очигледно препознале дека пеам чиста вистина“. Вистина е Екреме, до тоа ќе да e.

И уште еднаш, за секој случај, да повториме: The Indеpendent e сериозен...медиум.

И.Е. | Кајгана