Бранко Црвенковски создава хаос и замајување на јавноста за да се наметне врз народот, тој ја злоупотребува судбината на вистинските стечајци што тој ги создаде, изјавија од граѓанската иницијатива Жртви на транзиција, пред седиштето на СДСМ.
„Бранко почна да носи маици со некои си наркомани, а нас стечајците не заборави и се труди да прави немири во државата со цел да дојде на власт со лажни манипулации да го потсетиме дека нема да го заборавиме злото што ни го направи останавме без пари“ рече Воислав Тодоров од Жртви на транзиција.
Додека протестираа 20 тина луѓе пред седиштето на опозициската партија, поголем број стечајци од здружението УНИТ од Куманово се собраа пред Собранието.
Тие бараат државата ја ги обесштети бидејќи тие не заминале доброволно од работа.
„Државата е должна да не обесштети бидејќи нé истера од фирмите. Затоа на Премиерот му порачувам да не си игра со оваа група на работници. Ќе одиме по нивните домови. Ќе ги снајдат социјални немири како во Грција и Франција зошто овие луѓе на сé се спремни“, рече Претседателката нa УНИТ, Лилјана Георгиевска.
Георгиевска рече дека срамота е тоа што се згрижени само 960 лица, а останатите 5.000 стечајци се останати на улица.
Додека стечајците протестираа во Собранието опозицијата го праша Премиерот Никола Груевски дали мисли да го реши прашањето со стечајците како што ветил во 2008 година. На пратеничкото прашање Премиерот одговори дека го остварил ветувањето, односно дека 4.000 стечајци добиваат месено обесштетување од 6.000 денари до пензионирањето.
Стечајците од УНИТ бараат месечен надомест од околу 6.000 денари до пензионирањето или вработување за жени над 50 годишна возраст со 15 години работен стаж и за мажи над 53 години.
Стечајците протестираа во неколку наврати во главниот град и се случија инциденти помеѓу оние кои протестираа и возачите поради сообраќајниот хаос кој настана за време на овие настани.
