Не станува збор за фамозната женска главоболка која на припадничките на понежниот пол им служи како изговор за да немаат секс, туку за вистинска мигрена која почесто ги погаѓа мажите.
Пјетро Барбанти од Центарот за главоболка Сан Рафаеле во Рим, вели дека од таканаречената “сексуална главоболка“ (Coital cephalalgia) пати 1 процент од населението и дека истата може да биде многу болна и фрустрирачка.
Тој нагласува дека постојат два вида на “секс мигрена“. Едната се појавува за време на самиот сексуален чин, а другата настапува потоа. Првата е многу пораспространета, додека другата е многу поболна.
И додека повеќето хронични главоболки се почести кај жените отколку кај мажите, “сексуалната главоболка“ скоро три пати почесто ги погодува мажите. Се'уште не се знае зошто токму машкиот пол повеќе страда од овие главоболки, но Барбанти нагласува дека стресот е причина за 75% од хроничните главоболки и кај мажите и кај жените.
Инаку, главоболката предизвикана од секс е само една меѓу 200 видови главоболки кои стручњаците ги имаат идентификувано. Причина за некои од нив може да биде слика, мирис или звук. Така, Брабанти наведува пример на пациентка која добивала напад на мигрена штом осетела мирис на хот-дог, а имало и пациенти кои добивале мигрена штом слушнеле грмотевица или здогледале светли бои, пренесува ANSA.
И.Е. | Кајгана
