Судот во Комсомолск на Амур во Русија побара од Роснет (интернет провајдер) поради едно екстремистичко видео објавено на страниците на YouTube да го оневозможи пристапот до видео сервисот. Речено - сторено.
Конкретно, се работи за видео клип со име „Русија за Русите“, слоган кој го користат оние на кои мултиетничка Русија не им е омилена за поимање како нивна реалност. Видеото наводно изобилува со екстремно националистички и ксенофобичен визуелен материјал.
Па така YouTube сега е баниран во целиот Кабаровск регион на рускиот далечен исток, а од Роснет е побарано покрај YouTube да ги блокира и сајтовите lib.rus.ec, thelib.ru и zhurnal.ru - дигитални библиотеки кои содржат копија на „Mein Kampf“ на Адолф Хитлер.
Инженер од Роснет изјави дека компанијата им предложила на обвинителите да ги исконтактираат директно сајтовите кај кои е забележан некаков „проблем“ или експлицитен материјал за да го отстранат истиот. Тие не биле заинтересирани за оваа варијанта.
Од Google, газдите на YouTube го осудија потегот на судот во Кабаровск критикувајќи дека со ова на граѓаните на Русија им се крати уставното право на слободно информирање.
Други земји кои имаат ставено „бан“ на YouTube се: Кина, Пакистан, Турција и Иран, пишува Guardian.
Б.И. | Кајгана
