Воената драма Hurt Locker ја освои британската филмска награда БАФТА за најдобар филм и најдобра режија, а собра уште четири награди на свеченото доделување синоќа во Лондон.
Фото: bafta.org
Со ова режисерката на Hurt Locker Кетрин Бигалоу го засени хитот Avatar на нејзиниот поранешен сопруг Џејмс Камерон. Двата филма беа номинирани во 8 категории, а водат и по бројот на номинации за Оскарите кои ќе бидат доделени на 7. март.
Наградата БАФТА за најдобар актер ја доби Колин Фирт за улогата во A Single Man, а мало изненадување се случи во категоријата во која се бираше најдобрата актерка - победата ја однесе Кери Малиген за улогата во An Education.
Бигалоу стана првата жена која добила БАФТА за режија, а после доделувањето изјави: „Се надевам дека оваа награда нема да е последна. Борбата за еднаквост на жените е трајна борба, а ако оваа моја победа е уште еден зрак на светлина, тоа е прекрасно“.
Сценаристот на Hurt Locker Марк Боал ја доби БАФТА-та за најдобро оригинално сценарио, а филмот доби уште три награди во помалку експонирани категории.
Џејмс Камерон се наоѓаше во публиката, а неговиот Avatar, комерцијално најуспешниот филм во историјата, освои само две статуетки, за посебни визуелни ефекти и за продукциски дизајн.
БАФТА наградите обично ги фаворизираат британските филмови и филмски работници и не се сметаат за добар барометар за претстојните доделувања на многу попознатите Оскари.
На доделувањето во Кралската опера во Лондон меѓу другите присуствуваа и Квентин Тарантино, Кејт Винслет и принцот Вилијам, кој е именуван за нов претседател на БАФТА, заменувајќи го на тоа место британскиот режисер Ричард Атенборо.
Б.И. | Кајгана
