Во глобалната и исклучително снабдена продавница со име Интернет, може да си купите, на пример, музички албум, гардероба, дух во шишенце и “раскинувач“ (или личност која наместо вас ќе му каже на вашиот партнер “адиос“).
Бредли Лаборман во минатото бил оној кој најчесто добивал корпи од своите партнерки но, како во веќе видена филмска приказна, повредениот станува оној што повредува, па и Бредли најде начин како да биде оној што раскинува. А, освен што си лечи психички трауми и фрустрации, Лаборман истовремено заработува и пари од тоа (подобро си ја наредил и од психотерапевтите, секоја чест).
Овој 30 годишник минатата година ја лансираше страницата IDUMP4U.com, на која можете да си нарачате раскинување за поволна цена од 10 долари (кога ќе ви текне на сите солзи, молења, викања и останати непријатности кои доаѓаат во пакет со раскинувањето, цената на услугата одеднаш станува ептен прифатлива).
Откако ќе си платите, Бредли ќе се јави на вашиот, набрзо екс, партнер и ќе му објасни зошто сакате да раскинете, а после сето тоа ќе го објави на Youtube (не е тоа тоа без целиот свет да дознае, нели?)
И додека за Бредли Лаборман би морале да признаеме дека е креативен и смислил оригинален начин да заработи долар повеќе, ќе се воздржиме од коментари за оние кои плаќаат за неговата услуга.
Како и да е, ако некогаш осетите потреба од раскинување, нарачајте си го од официјалниот сајт, или разгледејте ги снимените раскинувања достапни на истиот поделени во категории како: психо, тажни, смешни и други (сигурно ќе ви дојдат добро за сеир, а може да ви послужат и како инспирација).
И.Е. | Кајгана
